I told you it would be back!

(Anm. der Red. im folgenden Beitrag wurden die Grössen L mit XS vertauscht)

Wies de Titel scho seit, ich bin Wächseldick.

Ich han mir ufgrund vo mim neue Astelligsverhältnis an die 15 Hemmli bimne online shop bstellt. Alli vode gliche billigmarke (da liit de wohl de knackpunkt :P).

All die Hemmli sind ide grössi XS, meh bruchi ja au ned. Und tatsächli, 10 vo dene Hemmli sind super, passe wie agosse, ned z gross, ned z chli sitze super ade Schultere. Aber die paar blaue woni bstellt han… Frächi sieche! Wenni ufrächt stahne sinds grad no okay. Aber sobald i anehocke und min Muskelbepackte Waschbrättbuch sich usbreitet, druckets und ziehts wie es Korsett!! JA BIN ICH DENN ES BURGFROILEIN USEM 18TE JAHRHUNDERT?

Naja, ich frog mi halt scho… XS ist halt nicht gleich XS. Klar, mer chönnt argumentiere, das da vo hersteller zu hersteller scho mal chan abwichige geh… ABER ES ISCH DE GLICH HERSTELLER.

Chan also nur na ei erchlärig geh. Bi wisse/farbige hemmli langet mim Buch es XS. Sobald er aber es blaus Hemmli gseht, fangt er sich a sträube und bläht sich uf vor wuet, daser sone farb muen über sich ergoh loh. Und zack: S.

Wenn das mini Modelagentur erfahrt… es S!!

Kennt öpper e Mittel gege Wächseldickheit?

Ich mueses zuegeh. Au wenns einigi vo euch scho wüssse… aber…

Ich bin vorbestraft.

Japp. Jetzt isches dusse. De Dröli isch es Kriminells Subjekt. Trurig aber wohr. Und ihr vertraued mir euchi Problem  und gheimnis ah.. MIR! Emene verbrächer!!

Aber kei Angst. Ich han mini Straf abgsässe und beroit.

Was ich gmacht han? Naja… Das ganze isch vor ca. 9 Johr passiert… Es fallt mer würkli schwer drüber z brichte…

Es isch na Dunkel gsi vorusse, au relativ chalt. Eigentlich hanis gar ned so planet gha…..

S schlimme isch ja gsi, dases ufem wäg zur Schuel passiert isch. Und mir isches bekannt gsi, das d Polizei ab und zue mal uf de Strosse stoht so früeh am morge… Eigentlich puuri Dummheit vo minere siite dassi mich verwütscht händ. Ned dases ke verabscheuigswürdigi Tat gsi wär wennis ungschore devo cho wär….

Uf jedefall hett mi denn sone Streife aghalte, mini Personalie ufgnoh und i ha weder zur Schuel döfe. Würklich schön, was füres Vertraue de Polizeiapperat jugendliche Straftäter engegebringt. Für das bini unglaublich dankbar.

Aber ich wott nüme wiiter um de heiss brei umerede… Ich mueses zuegeh. Ich bin ohni liecht am Velo zur Schuel gfahre. Strofmass: E 2 Siitige Ufsatz and Schuelpfläg wieso ich das gmacht han.

Ich schäm mich so sehr :(